Härzlech Willkomme

Häärzlech Willkomme uf mire Site. Kennet Dir dä Usdruck: Züüg u Gschichte ? Äbe, Verschidenes u so... So isch das der Name vo mim erschte Programm worde.

Schöön, dass Dir mi gfunde heit. Dir findet hie Informatione zum aktuelle Programm u zu künftige Projekt. Dir chöit uf der Kontaktsite Aafrage a mi richte u CD's bstelle.

• We Dir weit e Bärndütschnamittag oder -abe organisiere, de sit Dir hie genau richtig!
• Bärndütschi Gschichte u derzwüsche Handorgelemusig

Scho als Schüeler ha ni gäärn Gschichte gschribe, o we der Lehrer nid immer het der Iidruck gha, dass daas ussergwöönlechi Ufsätz si gsii. Mit Spielkamerade hei mer sälber Theaterstückli gschribe, d‘Rolle verteilt, u se, natürlech ooni Publikum , o grad ufgfüert. O i mim speetere Läbe isch es für mii wichtig gsii, als Kursleiter e so ds rede, wie mer der Schnabel gwachsen isch. So ha ni o ds Fach Betriibswirtschaft a der Technikerschuel ds Bäärn mit de Studierende uf Bäärndütsch besproche, o we hoochdütsch wär voorgschribe gsii. Mire Frou ha ni bi der erschte Begägnig erkläärt, dass dä Kurs uf Bäärndütsch isch, u denn isch das für sii no ne Frömdspraach gsii. I verschidene Witerbildige ha ni no seer viil über d‘Fiinheite vo der Spraach gleert. Mir isch es immer wichtig gsii, das o witer ds gää u d‘Mönsche ds erfreue. E Psycholoog het mer einisch gseit, vom Mönschetyp här sig i e Unterhalter. He nu, de sigs e soo. I freue mi druuf, Euch e Gschicht ds verzelle.

Hans Stalder